छंद - हास्य कविता
हास्य कविता स्पर्धेसाठी
*छंद*
मला बाई गाण्याचा भारीच छंद
करू नका कुणी माझे गाणे बंद
गाणे माझे ऐकून पळतात लहान मुले
म्हातारी कोतारी जागच्या जागी डुले
डुलता डुलता कधी लुडके कळतच नाही
गाणे माझे कुणाला मुळी आवडतच नाही
शेजारचे काका आले एकदा घरी
म्हणले मला फारच सुंदर गातेस पोरी
आनंद माझा गगनात मावेनासा झाला
काकांच्या रुपात जणु मोठा रसिकच आला
काका म्हणले रेडिओसाठी प्रयत्न आहेत माझे
रेडिओवर प्रसारित करावे गाणे बाळा तुझे
रेडिओवर तू गाणे गाशील जेव्हा
मुस्कट तरी दाबता येईल रेडिओचं तेव्हा
असे कसे सगळे मला अरसिकच भेटतात
गाणे माझे ऐकून दूर दूर पळतात
मी नाही करणार बाई गाणे माझे बंद
कारण मला मुळी गायनाचा भारीच छंद
*सौ अपर्णा सोवळे*
*यवतमाळ*
Comments
Post a Comment
Did you like this blog